Nagluwas kan saindang pag-suporta an nagkapirang mga senador sa pagkakatalaga ki Transportation Secretary Vince Dizon komo bagong sekretaryo kan Department of Public Works and Highways (DPWH).
Kasunod ini sa pagbubutas sa puwesto ni DPWH Secretary Manuel Bonoan.
Sinaysay ni Senate-President francis ‘Chiz’ Escudero na preparadong suportaran kan Senado si Dizon kun saen pig pangadyi ninda an trayumpo komo bagong DPWH Secretary.
Naglalaom ini na dagusang matuldukan ni Dizon an gabos nin mga nagaganap na kurapsyon sa ahensya. Pig-omaw man ni Senator Jinggoy Estrada an pagkakatalaga ki Dizon sa DPWH.
Sigun sa Senador na nagin marahay an ipinahiling ni Dizon sa DOTr kaya naglalaom ini na makakaputan kaini nin marhay man an DPWH.
Dae man malikayan kan Senador na mamundo sa pagbubutas ni Bonoan huli sa gikan ini sa hababang puwesto kan DPWH hasta umangat sa puwesto asin dae naghaloy mahali na man ini sa puwesto nin dae pa nasisimbag an mga kuwestiyonableng proyekto.
Pig-omaw man ni Sen. Erwin Tulfo sa pagkakatalaga ki Dizon huli sa laog kan anom na bulan kaini sa DOTr, kadakol na ining natawan nin aksyon.
Nagkakanigo na magtukaw si Dizon sa DPWH huli sa dakol nin mga reklamo dapit sa flood control projects, kaipuhan an sekretaryo na agresibo siring na sana ni Dzion asin naglalaom pa an Senador na sa pamamayo ni Dizon, mawakasan na an sabwatan kan mga kontratista, pirang opisyal kan DPWH asin man ibang mga public officials.
Sa lado man ni Sen. Joel Villanueva, na sarong magabat ngunyan na trabaho ni Dizon iyo an paglilinig kan DPWH.
Magigin crucial an saiyang pagkakatalaga huli sa pigtao sa saiya ni Presidente Ferdinand Marcos Jr an bilog na tiwala tangani pamayuhan an DPWH na nahahampang ngunyan sa kontrobersiya.
Pigsierto ni Sen. Villanueva na itatao ninda an bilog na suporta sa bagong mamamayo kan lado kan DPWH.
