Dae pa man nagpopoon magpinta nin Apple Green an mga driver kan Centoda, alagad masunod tulos sinda kun talagang ipatupad na an ordinansa.
Sa intrevista kan Bombo Radyo NagaS ki Emanuel Orong, sarong tricycle driver asin miyembro kan Centoda, sinabi kaini na mas magayon kun magiging unipormado na an kulay kan mga tricycle, orog na mas marhay ining hilingon kun pare-pareho an kulay.
Magigirumduman na ordinansa na lang an hinahalat tanganing maging opisyal an pagkakaigwa nin sarong kulay kan mga trimobile sa Naga City, matapos na maaprubahan sa nangyaring committee hearing na dapat Apple Green gabos an kulay kaini.
Segun ki Orong, mayo man sindang subuot kun maimplementar na ini kaya masunod na lang sinda. Dae man ini magiging problema kun saro lang an saindang kulay ta igwa man sinda nin kanya-kanyang terminal asin iba-iba man an sidecar number.
Mas makakatabang man ini tanganing mas maging organisado an mga tricycle asin mas magayon man ini para sa saindang mga driver.
