NAGA CITY- Prayoridad kan LGU-Naga an paghahanap nin mga warehouse na pwedeng maaalagan kan mga stock na ayuda para sa pangangaipuhan tuyong igwang kalamidad.
Sa nagin paghampang sa mga kagawad kan media ni Naga City Mayor Leni Robredo, sinaysay kaini na igwang problema an siyudad pag-abot sa preparasyon sa mga maabot na kalamidad orog na ta maski igwang naka-stock na idedestrebwer na ayuda dae pa man giraray ini bastante.
Katakod digde, pig-asegurar man kan alkalde na igwang pondo na nakatagama alagad kaipuhan ninda an paghahanap nin mga warehouse na malalagan kan mga stock pile.
Dugang pa kan opisyal yaon man an pagsierto sa lado kan DSWD na igwang dakol na stock an saindang ahensiya asin preparado na magtaong tabang sa LGU-Naga.
Sa ibong na lado, pig-aasikaso naman kan lokal na gobierno kan siyudad nin Naga an mga dugang na empleyado sa Naga City General Hospital tanganing mas makapagtao pa nin serbisyo sa mga nangangaipuhan kaini.
Sigun sa alkalde, mababawi man soboot an gastos kun kaya kaipuhan na enoton an mga importanteng panuan sa ospital siring kan mga personahe. Sa ngunyan, padagos an paglalapigot kan LGU-Naga tanganing masimbagan an gabos na pangangaipuhan kan siyudad.
