Nagtitinir na pano nin rice buffer stocks an mga warehouse kan National Food Authority (NFA) sa bilog na nasyon sa ibong kan sunod-sunod na bagyong tumama kan mga nakalihis na semana.
Dae pa man substantially nababawasan ang mga stock sa mga bodega, susog pa ki NFA Administrator Larry Lacson.
Sigun sa opisyal, preparado an NFA sa pag abot kan mga bagyo asin duwa sana an nairehistro na naraot na bodega. Saro an sa Alaminos, Pangasinan asin saro pa sa La Union.
May bastante na imbentaryo an NFA na kayang maghaloy nin hasta sa 12 aldaw, katampad kan 452,000 metriko tonelada nin paroy o poco mas o menos siyam na milyong sako nin bagas.
Paliwanag ni Lacson, sa rason na an naglalaog na mga paroy na pigbabakal sa paraoma an mas kadakol kumparar man sa mga nagluluwas na bagas.
Inihayag man kan opisyal an plano kan ahensya na magtugdok nin mga Kadiwa store sa kada warehouse kan NFA tangani makatabang sa mga paraoma na maipabakal an saindang ani sa mas kadakol pang lugar.
Sa mga warehouse mismo kan NFA mabugtak an DA kan nasambitan ng Kadiwa ng Pangulo.
Pupuonan sa Region 1 asin Region 3, asin man padikit-dikit ining ilalarga sa iba pang rehiyon.
Mapakol man sa 7,685,943 katao o 2,121,645 pamilya an naapektaran kan Tropical Cyclones Crising, Dante, Emong, asin kan Habagat sa haros gabos nin rehiyon apwera sa Eastern Visayas.
Nangengenot sa pinakadakol na naapektaran an Central Luzon na may 2,820,250 katao.
Mientrastanto, nairehistro an kabilogang danyos na P10.08 bilyon sa imprastruktura, P1.96 bilyon sa agrikultura, asin man P281.66 milyon sa mga irrigation system kawsa kan mga nasambitan ng kalamidad.
