NAGA CITY– Sa kulungan an bagsak kan saro sa mga miembro kan Recca Criminal Group na nag-ooperar sa probinsya kan Batangas asin mga kataraid na banwaan.
Binisto an suspek na si Jopel Macarang.
Sa nakuang impormasyon kan Bombo Radyo Naga hale sa Batangas Police Provincial Office, nadakop si Macarang sa Fora Malls, Barangay Silang Crossing East, Tagaytay City.
Si Macarang an kinokonsiderar komo ranked number 3 sa Top 10 most wanted person sa Provincial Level para sa 2nd Quarter kan 2019 asin kaibahan sa mga High Value Target Level 1.
Nadakop an suspek sa lindong kan duwang madamiento de aresto na iniluwas ni Hon. Aida Carrera Santos, Presiding Judge kan RTC Branch 7, Batangas City para sa kasong Murder na mayong nirerekomendang pyansa.
Napag-araman na an suspek an pigtutukdong prime suspect sa panggagadan ki Ernesto Montalbo, barangay tanod kan Sta Clara, Batangas City kan nakaaging Setyembre 2018.
