NAGA CITY– Nagkaengkwentro giraray an tropa kan gobyerno asin rebeldeng New People’s Army (NPA) pasado alas 1:05 nin hapon kasubago sa Sitio Cuntod, Barangay Tabgon, Goa, Camarines Sur.
Sa entrevista kan Bombo Radyo Naga ki Capt. Joash Pramis, chief kan Division of Public Affairs Office (DPAO), sinaysay kaini na tulos nagresponde an tropa kan 83rd Infantry Batallion makalihis makarisibe nin impormasyon dapit sa presensya kan armadong grupo na nagigibo nin extortion activity sa lugar.
Sigon ki Pramis, naabutan kan mga suldados an nasa 20 rebelde na nagin dalan para magribayan nin putok an duwang parte na naghaloy nin haros limang minutos.
Narekober sa lugar kan pinangyarihan an tolong .45 caliber pistol, mga gamit sa pagibo nin Improvised Explosive Device asin iba pang personal na gamit kan nasambitan ng grupo.
Mientrastanto, sarong Cafgu naman an nairehistrong nalugadan sa nasambitan ng engkwentro na tulos na ipigdalagan sa ospital.
Napag-araman na ini na an ika-sampulong engkwentro sa pagultanan kan pwersa kan gobyerno asin mga NPA na nairehistro sa Bicol puon kan bawion kan gobyerno an ipinautob na unilateral ceasefire.
