Nag-aapelar an mga minimum wage earners sa Bicol Region para sa dagdag na wage increase huli sa padagos na paglangkaw kan presyo kan mga basic commodities asin pamasahe.
Sa intrevista kan Bombo Radyo Naga ki Rosa M. Bansagales — Street Sweeper, sinabi kaini na dawa nagkaigwa nin pagtaas sa sweldo, kulang pa man giraray ini sa pang-aro-aldaw na pangangaipo, orog na an gastos sa pagkakan, iba pang basic commodities asin transportasyon. Kabale sa mga naglalaom na madagdagan pa an sueldo. Sinabi niya na dakulang parte kan saiyang kita an napapaduman sa mga basic necessities asin pamasahe huli ta kaipuhan niyang mag-commute pasiring sa trabaho.
Nag-insistir siya na an presenteng minimum wage bakong igo tanganing makasabay sa padagos na paglangkaw kan gastos sa mga barakalon asin pamasahe.
Mawot kan mga trabahador na hilingon giraray kan Department of Labor and Employment (DOLE) an eksistidong Provincial Wage Rate sa Bicol Region asin pag-adalan an posibilidad nin dagdag na wage increase.
Mientrastanto, nag-epekto na an ₱60 wage increase para sa mga minimum wage earners sa Metro Manila sa lindong kan Wage Order No. NCR-25, mantang an minimum wage rate sa Bicol Region ₱455 kada aldaw, base sa report.
Sa ngonian, pighahalat kan mga trabahador sa Bicol an aksyon asin posibleng orden kan DOLE manungod sa saindang pangapudan para sa wage increase.
