Pigsierto ni Senate Minority Leader Alan Peter Cayetano na sa ngaran kan kooperasyon asin transparency padagos na makikipagtabangan an minorya ki Senate President pro-tempore Ping Lacson sa pagbubwelta kaini komo chairman kan Blue Ribbon Committee.
Sigun ki Cayetano, pigrerespeto soboot ninda kun ano man an magin desisyon kan mayorya asin padagos sindang magtatrabaho sa irarom kan pamunuan ni Lacson sa BRC.
Pigpunto kan senador na ngunyan importanteng magkasundo an mga lehislador sa sarong malinaw na direksyon asin patas na pagtatakda kan mga rule asin dae mabase sa kun siisay man an magigin chairman lan komite.
Pigtawan-duon pa ni Cayetano na an kapangyarihan kan BRC nakasalalay sa integridad asin dapat na gamiton an mga pagdangog kan komite tanganing mabuyagyag an mga mastermind sa likod kan katiwalian asin ibusol an totoo asin sistematikong reporma sa mga ahensyang naiimbwelto sa korapsyon.
Dugang pa ni Cayetano na obligasyon kan mga senador sa mga Pilipino na ibwelta an tiwala sa institusyon kaya dapat na igilid an pulitika asin magkasararo para sa katotohanan asin accountability kan mga imbwelto sa maanomalyang ghost asin substandard flood control projects.
