NAGA CITY- Pigkondusir subagong aga an sarong banal na santa misa sa ciudad nin Naga komo pakikisumaro asin pagpapahiling nin suporta ki Vice President Leni Robredo katakod kan pagpoon kasubago kan manual recount kan Presidential Electoral Tribunal (PET) sa mga balota sa 2016 Vice Presidential Race.
Pigkondusir an misa sa Parish of San Francisco de Assisi sa nasambitang ciudad na pig-atendiran ni Camarines Sur third district Rep. Gabby Bordado asin kan nagkakapirang mga tagasuporta kan bise presidente.
Obheto suboot kaini na ipangadyi na magluwas na an katotoohan asin mauntok na an pagpalakop nin mga fake news manungod sa electoral protest na pigsangat ni dating Senador Ferdinand ‘Bongbong’ Marcos.
Kumpyansa man an kongresista na magana an Bicolanang opisyal sa electoral protest asin nagtitinir suboot an saindang pagtubod sa integridad kan pigkondusir na eleksyon kan taong 2016 siring man sa kapabilidad kan Commission on Elections (Comelec) asin kan Supreme Court na nagtitindog komo PET.
Dugang pa ni Bordado, depende sa mga abogado kan duwang lado kun ano an saindang magigin aksyon katakod kan naenot na pahayag ni Marcos na igwa suboot mga basang balota na hale sa banwaan nin Bato, Camarines Sur asin nawawara man an pira sa mga audit logs kaini.
