Pigsierto kan Metropolitan Naga Water District (MNWD) na mayong kakulangan nin tubig sa Ciudad nin Naga asin mga pagtaraid na lugar kaini, sa ibong kan mainit na panahon asin mga bareta na may periodic water interruptions.
Sa intrevista kan Bombo Radyo Naga ki Choppy Dy-Liacco Dela Cruz (Public Information Officer, Metropolitan Naga Water District), sinaysay kaini na supisyente na an presenteng supply nin tubig asin an produksyon minaabot sa poco mas o menos 2.2 million cubic meters kada bulan. An mga pagkaantala sa tubig parati na kawsa kan mga brownout na nakakaapektar sa mga istasyon nin pagbomba asin nagreresulta sa pansamantalang pagluway kan suplay.
Lininaw man kan ahensya an dai pa sana nahahaloy na paglangkaw kan presyo kan tubig, na iyo an enot na adjustment sa laog nin 17 taon. Segun sa sainda, nag-agi ini sa public consultation asin inaprobaran kan Local Water Utilities Administration (LWUA).
Sa tahaw kaini, pigsierto kan MNWD na mantenidong saro sa pinakahababa an saindang water rates sa rehiyon asin padagos an preparasyon para sa posibleng epekto kan El Niño sa tabang kan datos hale sa PAGASA.
Inenkaminar man an publiko na magtipid nin tubig mantang nagpapadagos an mga proyektong pagpakarhay sa sistema nin suplay.
