NAGA CITY- Nagpapadagos an konstruksyon kan modernize warehouse kan NFA-Camarines Sur sa Libmanan.
Sa entrevista kan Bombo Radyo Naga ki Marbin Malabanan, Acting Branch Manager kan NFA-Camarines Sur, sinaysay kaini na piglalaoman matapos an konstruksyon kan nasambitan ng pasilidad sa maabot na bulan kan July o Oktubre.
Sigun pa ki Malabanan, kadakol mga rason kun tano nagkaigwa nin delay susog naman sa nagin paliwanag kan contractor.
Kabali na digde an mga naeksperyensiyahan na bagyo, pag-uuran siringman an paglangkaw sa presyo kan mga materyales na ginagamit sa pagtindog kan pasilidad.
Katakod digde, pigsierto man kan opisyal na pirmeng pig-assess kan Regional Office an compliance kan contractor orog na ta igwa ining pigtalaan na panahon kan completion.
Dugang pa ni Malabanan, valid man an rason kan contractor asin nahihiling man soboot ninda na ginigibo kan mga ini an gabos tanganing matapos na an pasilidad asin magamit na.
Marurumduman, an modernize warehouse kan NFA an maserbeng bugtakan kan mga stocks asin mga ekipahe siring kan rice mill asin dryer palay machine.
Mientrastanto, padagos man na ginigibuhang paagi kan NFA na magkaigwa nin espasyon an saindang mga existing warehouses tanganing pag-abot kan bulan nin Marso kun saen aranihan kan paroy igwang mabubugtakan.
Sa ngunyan, pigsierto ni Malabanan na igwa sindang pigsusunod na action plan tanganing magtinir na bastante an suplay kan bagas bako sana sa Camarines Sur kundi magin sa enterong Bicol Region.
