NAGA CITY- Pigmimirar ngonyan na ‘superwoman’ kan sarong unibersidad an saindang estudyante na binistong Ms. Bicolandia 2018 First Runner up Krystel Sales.
Sa entrevista kan Bombo Radyo Naga ki Kenjie Jimenea, Dean kan College of Arts and Sciences kan University of Nueva Caceres (UNC), sinaysay kaini na nagin estudyante niya sa laog nin apat na taon an beauty queen na mas bistado sa apod na ‘Tel’ mantang nagkaklase pa ini sa kursong AB Political Science sa nasambitang unibersidad.
Sigon ki Jimenea, aktibo na si Sales sa mga leadership activities asin pagpartisipar sa mga pageant kan nagkaklase pa sana sa kolehiyo kaya dae na sinda nakubanan kan magin kandidata ini sa prestihiyong Ms. Bicolandia.
Para ki Jimenea, maimimirar suboot na sarong ‘superwoman’ si Sales huli ta nagibo kaining mapagsabay an saiyang pagklase sa College of Law, pagtatrabaho komo paratukdo sa Senior High School department kan unibersidad asin an preparasyon para sa beauty pageant.
Katakod kaini, nagpaplano na suboot an unibersidad nin aktibidad para maiselebrar an trayumpo ni Sales sa Ms. Bicolandia 2018.
Mientrastanto, naipuli man kan Albayana beauty na si Famaele Nica Carriaga an korona komo Ms. Bicolandia 2018 makalihis na ikondusir an coronation night subanggi sa Jesse M. Robredo Coliseum sa ciudad nin Naga.
