Tanganing ma maprotehiran pa an mga datos na presenteng kapot kan ahensiya, opisyal na ipiglunsar kan Movie and Television Review and Classification Board (MTRCB) kan nakalihis na Miyerkules, Enero 15, 2025, an Data Privacy Management Progam kaini kasunod kan pagsasagibo kan enot na data privacy training para sa mga board member asin empleyado kan MTRCB.
Parte ini kan inisyatiba kan MTRCB na masierto an seguridad kan mga sensitibong impormasyon komo pagtalima sa Data Privacy Act of 2012.
Obheto kan programa na maaraman an gabos na personal na datos na pigkokolektar, pigpoproseso asin itinago kan ahensiya, pati na man an pagbilog asin pagpapautob kan polisiya tanganing masierto na epektibong napapamayuhan kan MTRCB an gabos na datos asin malikayan an anuman na insidente asin pagkokompromiso sa mga ini.
Pigtawan-duon ni MTRCB Chairperson and CEO Lala Sotto-Antonio an dedikasyon kan Board na mapangalagaan an gabos na datos na kapit kan ahensiya.
Binisto man kaini an importanteng parte kan data privacy sa makabagong panahon.
An nagin pagsasanay man para sa mga empleyado asin Board Member an nagin paagi tanganing magkaigwa nin praktikal na kaaraman an mga ini asin tanganing masierto na nakalinyada sa nag-iiral na polisiya asin regulasyon an kada proseso kan ahensiya sa pagprotehir kan mga sensitibong datos.
Padagos man an pagsierto kan MTRCB na bukod sa mandato kaining pagprotehir sa mga nagdadalan sa paagi kan pagtataong kaaraman sa responsableng pagdalan, pighingowa man kan Board na masierto an seguridad kan gabos kan impormasyon na panalmingan sa dedikasyon kan ahensiya sa halangkaw na lebel kan serbisyo publiko.
