Nagpatanid an Malacañang sa publiko na dai mag-panic buy makalihis an anunsyo kan pagtaas kan presyo kan mga produktong petrolyo huli sa giyera kan US-Israel asin Iran.
Palace Press Officer Atty. Claire Castro na malinaw sa mensahe kan Presidente na maninigo asin napapanahon an pag-andam sa anuman na sitwasyon, lalo na ta dae pa nag-uuntok an kariribokan sa Middle East.
Tinawang-duon ni Castro na bako ini an panahon na magturog na sana nin tuninong huli ta kita an lugi kun magin kampante an gobyerno.
Sinabi man kaini na antes pa man ginibo an anunsyo kan Presidente, nagtao na siya nin marching order na iimplementar an mga plan interventions para mapagian an pagabat kan publiko, kun tano ta naggigibo nin mga lakdang an gobyerno kabale na an pagmonitor asin pagdisiplina sa mga gasolinahan.
Sinabi ni Department of Energy (DOE) Secretary Sharon Garin na pinakusog ninda an inspeksyon sa mga gasolinahan sa pakikipagtabangan kan Department of Interior and Local Government (DILG) asin kan Philippine National Police (PNP) ngani na maibitaran an hoarding, profiteering o supply manipulation.
Sa rason na ini, nangapudan si Garin sa publiko na magdanay na kalmado huli ta ginigibo kan gobyerno an gabos para maseguro an estableng supply asin patas na presyo kan produktong lana sa bilog na nasyon.
An pahayag may koneksyon sa mga bareta na naglangkaw na an presyo kan mga produktong lana asin nag-eeksperyensya na nin hoarding an nagkapirang gasolinahan sa nasyon dawa ngani nakatalaan na an price adjustment sa Martes.
