NAGA CITY- Pigtawan duon ni Naga City Mayor Leni Robredo na welcome sa siyudad nin Naga an mga bisita magin an mga opisyal kan gobierno nasyunal na mawot makisumaro sa kafiestahan ni Ina Peñafrancia.
Marurumduman, enot nang nagpahayag kan saiyang kamawotan na makiselebrar sa okasyon si Bise Presidente Sara Duterte kasabay naman kan pakikipag-ulay ki Robredo asin sa iba pang opisyal sa Bicol Region.
Bako ini an enot na pagkakataon na nagbisita si Duterte sa siyudad nin Naga huli ta kan nakalihis na taong 2024 present man ini sa kaparehas na okasyon.
Nakaulay pa kaini si Robredo kun saen pig-apod na personal asin bakong political an nasambitan ng meeting. Sigun sa alkalde, bukas an Naga City para sa gabos asin dae dapat pairalon an politika partikular sa panahon kan selebrasyon.
Tuyong bulan nin Setyembre milyon-milyon na deboto an nagbubulos sa siyudad nin Naga tanganing makisumaro sa manlaen-laen na aktibidad na igwang kinaaraman sa Peñafrancia Fiesta partikular sa Traslacion asin Fluvial Procession.
Sa ngunyan, kamawotan na sana kan lokal na gobierno kan siyudad nin Naga an matuninong asin solemne na pagselebrar kan Peñafrancia Fiesta ngunyan na taon.
