Naghigot nin protocol an Naga City District Abattoir bilang tugon sa banta kan African Swine Fever o ASF sa Ciudad kan Naga City.
Sa intervista kan Bombo Radyo Naga ki Anselmo Maño – Acting Head, Naga City District Abattoir, sinaysay kaining nagsagibo nin sampling sa pirang backyard hog raisers sa Carolina Zone 1 matapos maiulat an banta kan ASF. Siring man, mayu man nakuang positibong kaso hale sa isinagibong sampling.
Tulos naman nakipag-takod an City Veterinary Office sa Philippine National Police asin mga barangay official, mantang nagpakundisir man nin mga checkpoint tanganig masubaybayan asin makontrol an pagluwas kan mga atamang orig mula sa apektadong lugar.
Sa balyo kan ipigkukundusir na pag-iingat, nagpapadagos naman an operasyon kan abattoir. Segun kay Maño, umaabot pa man sa average na 200 payu kan baboy kada aldaw an saindang pinoproseso tanganing mamantinir an suplay asin production level kan karne kan orig sa ciudad.
Padagos man an visual inspection kan mga livestock inspector sa mga orig antes tanggapon sin iproseso sa abattoir bilang parte kan saindang safety measures.
Mahigot man minomonitor kan abattoir an pinagpoonan kan mga orig asin an kinakaipuhang dokumentasyon asin permit tanganing masiguro na dae nakakalaog an mga livestock mula sa red zone o iba pang restricted areas.
Mientrastano, ipinapakundisir man an mga kinakaipuhang disinfection asin biosecurity measures sa laog kan pasilidad. Kun may mahiling na orig na may sintomas o kahina-hinalang kondisyon, isinasairarom inin sa kaukulang pagsusuri asin dae basta-basta iniiba sa processing line.
Tinawan-doun ni Maño na mahalaga an dagos-dagos na koordinasyon kan abattoir, City Veterinary Office, barangay officials asin mga awtoridad sa border checkpoints tanganing maiwasan an paglaog kan mga orig asin karne hale sa mga lugar na may restriction.
Sa ngunyan, sinabi ni Maño na mayu pang dakulang epekto sa operasyon kan abattoir an ipinakukundisir na restrictions, mantang padagos na binabantayan an sitwasyon tanganing maprotektahan an industriya kan orig asin kaligtasan kan mga parabakal.
