Ire-schedule an plebisito sa Ciudad nin Naga makalihis an pag-oktaba kan Pirilian sa Barangay asin Sangguniang Kabataan (BSKE) na nakatalaan sa Nobyembre 2, 2026.
Sa intrevista kan Bombo Radyo Naga kay Atty. Maico Julia Jr., Election Officer III kan Commission on Elections (Comelec) Naga, sinaysay kaini na dae na kasabay kan BSKE an plebisito huli sa pag-oktaba kan eleksyon. Nasa preliminary coordination na an Comelec Central Office asin lokal na gobyerno kan Ciudad nin Naga dapit sa bagong schedule asin gastos para sa plebisito.
Sinabi pa ni Julia na kun pwede ining gibohon kasabay kan BSKE, pigkakarkulong maabot sa P22 milyones an gastos, mantang pwedesir ining mag-abot sa mga P50 milyones kun igwa ining separadong schedule.
Igwa nin mga petsa na pig-aadalan para sa plebisito, kabali an Nobyembre 2026 asin posibleng mga petsa sa amay na parte kan 2027.
Alagad, mayo pang pinal na petsa an itinalaan para sa mga eleksyon.
Segon ki Julia, preparado na an Comelec Naga dara an kinakaipuhan na preparasyon para sa plebisito, kabali na an voters list, polling places, election personnel, balota, asin iba pang election materials. An kalendaryo kan mga aktibidad asin giya kaipuhan man na i-adjust sa bagong iskedyul.
Mientrastanto, sinabi ni Julia na kaipuhan na magdanay na updated an mga botante sa mga mangyayari sa maabot na panahon, kabali na an anuman na legal na lakdang na pwedeng makaapektar sa pag-oktaba kan BSKE.
Sa irarom kan bagong iskedyul, an BSKE nakatalaan na gibohon sa Nobyembre 2028, mantang an voter registration mabalik sa ikaduwang semana kan Nobyembre ngonian na taon.
Pighahalat pa kan mga botante sa Ciudad nin Naga an opisyal na pag-anunsyo kan Comelec kan panibagong petsa kan plebisito.
