(UPDATE) NAGA CITY- Pinahimutikan ni Camarines Sur Vice Gov. Fortunato ‘Ato’ Peña an mga impormasyon na nagkaigwa sinda nin dae pagkakaintindihan ni Gov. Migz Villafuerte kun kaya nagdesisyon siya na magbutas na sa saiyang pwesto.
Sa entrevista kan Bombo Radyo Naga sinaysay kan bise gobernador, na marhay an relasyon ninda ni Villafuerte asin bakong totoong nagkaigwa sinda nin iwal na nagin dalan sa saiyang pagsusumiter nin resignation ki presidente Rodrigo Duterte.
Dawa na nagbutas na sa saiyang pwesto huli sa ‘personal and family reasons’, pigsierto ni Peña na nagtitinir an bilog niyang suporta sa gobernador siring man sa Team One CamSur urog na sa maabot na May 2019 Midterm Elections.
Poon pa suboot kan Oktubre 2018, pinag-isipan na niya an pagbubutas sa pwesto asin naikonsulta niya na ini sa mga pag-iriba sa provincial government kun kaya mayo na suboot pagkakataon na mabago pa an saiyang desisyon.
Sa ngonyan, hinahalat na sana ni Peña an magigin desisyon ni Presidente Duterte sa saiyang resignation mantang naipadara na niya an kopya kaini sa Department of Interior and Local Government (DILG) asin sa Office of the Governor.
Mientrastanto, nirerespeto man ni Villafuerte an nagin desisyon ni Peña na apat na bulan na sana kuta nakatalaan nang magbaba sa saiyang ikatolo asin huring termino komo bise gobernador kan probinsya.
Napag-araman na sa maabot na Pebrero 28, 2019 magigin epektibo an resignation ni Peña komo bise gobernador.
