NAGA CITY- Dae suboot nalikayan na mahandal asin magpanic an nagkapirang mga namamanwaan sa banwaan nin Pandan, Catanduanes makalihis an nagtamang magnitude 6.0 na linog sa saindang banwaan suodma.
Sa entrevista kan Bombo Radyo Naga ki Pandan Vice Mayor Concordio Delos Santos, sinaysay kaini na makalihis an nairehistrong pagyugo yugo sa saindang banwaan, tulos man siyang naglibot sa lugar para masierto na mayong nairido o nadanyaran na mga edificio digdi.
Dae man suboot nalikayan kan nagkapira sa mga residente an magpanic asin mahandal huli sa nasambitang pagyugo yugo.
Dugang pa kan opisyal, aktibo an ginigibong koordinasyon kan saindang Municipal Disaster Risk Reduction and Management Office (MDRRMO) sa manlaen laeng ahensya kan gobyerno makalihis an nagtamang linog.
Inaaram pa man suboot hasta sa ngonyan kun totoo an impormasyon na sinasabing igwang nadangog na ugong an nagkapirang mga residente mantang naglilinog sa saindang lugar.
Mientrastanto, susog sa bise alkalde, mahigot an saindang ginigibong pagbabantay ngonyan partikularmente na sa mga coastal areas sa saindang banwaan huli sa posibilidad nin mga aftershocks.
Marurumduman na nagtama an magnitude 6.0 na linog pasado alas-2:19 nin hapon suodma asin nadiskobre an epicenter kaini 46 km norte norteng sulnupan kan Philippine Sea asin igwa ini nin rarom na 21 km asin tectonic an pinaghalean.
