Nahiling kan nagkapirang parasira kan Zambales an bulto kan shabu na papataw-pataw sa kadagatang direktang nakahampang sa West Phillipine Sea.
Basado sa report kan Philippine Drug Enforcement Agency (PDEA), pauli na soboot an grupo kan mga parasira gikan sa sarong aldaw kaining pagsisisra sa katubigan na parte kan WPS kan nahiling an nagkapirang mga plastic bag na papataw-pataw sa kadagatan.
Tulos na kinua kan mga parasira an mga nasambitan ng plastic bag asin dae naghaloy naaraman na igwang mga laog ini nin shabu.
Kabilugang 11 na pakete an nakua kan mga parasira.
Tolos na man dinara sa mga opisyal kan Brgy. Matain, Subic an mga nasambitan ng pakete.
Makalihis ini pigpasakamot na man sa PDEA-Zambales asin Philippine National Police.
Sigun sa PDEA, pigkakarkulong nagkakantedad nin P12.24 million an mga nakuang pakete asin igwang gabat na labi sa 1.8 kilo.
An grupo kan mga parasira pigbibilog kan 7 crew asin sarong boat captain.
Sa saindang istorya, nahiling soboot ninda an mga nasambitan ng kontrabando na poco mas o menos 90 nautical miles puon sa Lubang Islands sa Occidental Mindoro.
