NAGA CITY– Kinumpirmar ngunyan kan National Irrigation Administration (NIA) na nagkapira sa saindang mga proyekto sa probinsya kan Camarines Norte an pigbagatan kan suboot mga rebeldeng New People’s Army (NPA).
Sa entrevista kan Bombo Radyo Naga ki Engr. Alvin Macasinag, Manager ng NIA-CamNorte, sinaysay kaini na naki-olay digdi an mga para-oma hale sa Barangay San Jose, banwaan nin Jose Panganiban na ipadagos an dam project huli ta apektado na kaini an saindang pag-oma.
Katakod kaini, liwat na nagpadagos an contructor sa nasambitan ng proyekto alagad mantang kasagsagi kan konstruksyon, sarong indibidwal an nagpabistong “Ka Bruno” an nag-rani sa contructor asin nagkapirang opisyal kan organisasyon kan mga para-oma asin pinapundo an patrabaho kun dae, baad may mangyari.
Huli sa takot, liwat na naman nag-pondo an konstruksyon kan proyekto sa ibong kan pangangaipo kan mga para-oma.
Sigun ki Macasinag, sa inisyal na impormasyon na naresibe ninda, may pighahagad an nasambitan ng grupo sa contructor na dae kaini naitao kaya pirit na pigbagatan an proyekto.
Sa ngunyan, plano na kan saindang opisina na maki-olay sa regional office dapit sa problema.
