Sinaysay ni Agriculture Secretary Francisco Tiu Laurel Jr. kan nakalihis na Martes na masusing sinusubaybayan kan gobyerno an mga rice trader kasunod kan implementasyon kan 60-day import ban sa regular asin man well-milled na bagas, na pinatanidan an mga abusadong importer na pwede ining mawaran nin permit.
Pigsaysay ni Laurel na an mga presyo kan bagas sa lokal na merkado an naglangkaw magpuon kan ideneklarang pag-ban, na may nagkapirang imported na ipinapabakal sa halangka na kantidad sa ibong kan mas baratong mga opsyon na magagamit.
Pig inkaminar kaini an mga parabakal na magin mas matalino sa saindang mga pagbakal, mantang pig aasegurar na sinusubaybayan kan Department of Agriculture (DA) an pagsunod kan mga retailer nin bagas sa ban.
Pakiulay pa kan opisyal sa mga consumers na hilingon marhay an mga bagas asin kun pwede dapat marhay man an mga barato na imported. Naglilibot kaya sinda asin man mino-monitor an mga import.
Asin nakaulay man ninda an mga importers association asin pintanidan na kun umaabuso sinda digde, baka i-blacklist man an mga ini o halion sinda nin mga import permit sa futuro.
Mientrastanto, sinabi ni Laurel na an import ban an nagtao nin paramientras na paglangkaw nin presyo kan paroy sa mga paraoma.
Antes man na ianunsyar, igwa na nin mga paroy na P8 hasta P10 per kilo. Alagad kan ianunsyar na ni Presidente Marcos nag pakol na sa P14 hasta P15. Igwa man nin ibang lugar na nagpakol nin P8 hasta P10, P12 hasta P13. Nakatabang man ini alagad talgang kulang pa man giraray.
Nilinaw kan hepe kan Agrikultura na an 60-aldaw na ban an paramientras na lakdang, na pigtawan duon an pangangaipuhan na amyendaran an Rice Tariffication Law (RTL) komo panghaluyang solusyon.
An nasambitan ng 60-aldaw na ban sa pag-import nin bagas an nagkabisa ngunyan na semana komo parte pa kan paglalapigot kan gobyerno na papusugon an mga presyo kan lokal na farm gate asin man protehiran an mga paraoma na Pinoy.
