Red Alert Status na an Municipal Disaster Risk Reduction and Management Office (MDRRMO) kan Libmanan bilang preparasyon sa pagdagsa kan mga deboto ngunyan na Semana Santa.
Sa intrevista kan Bombo Radyo Naga ki Jemuel Guerro, Operation Head kan Municipal Disaster Risk Reduction and Management Office kan Libmanan, sinabi kaini na nakapuwesto na an saindang mga response team sa haros lima sagkod anom na parokya sa banwaan tanganing masigurado an madaliang pagresponde sa ano man na insidente. Kabilang sa mga naka-deploy an mga miyembro kan Bureau of Fire Protection (BFP), Philippine National Police (PNP), Philippine Coast Guard Auxiliary (PCGA), asin mga boluntaryo na katuwang kan lokal na gobyerno.
Paliwangan kaini na igwa man nin mga ambulansya asin response vehicles na nakaantabay sa kada parokya, mantang an mga Rural Health Unit (RHU), partikular an RHU 3, naka-standby man tanganing magserbisyo sa oras nin emerhensiya.
Karaniwan na nagtatapos an mga aktibidad sa simbahan mga alas-siyete sagkod alas-nuwebe nin banggi, depende sa iskedyul kan kada parokya.
Sa ngunyan, matuning pa man an daloy kan trapiko sa banwaan, pero padagos an pagbabantay kan mga otoridad lalo na sa tahaw kan krisis sa petrolyo. Pigtawan duon man ni Guerrero na 100% operational an saindang mga sasakyan para sa ano man na emergency response.
Mientrastanto, igwa na nin naitalang pira na minor na insidente, kabilang an mga aksidente sa motorsiklo, alagad dai man ini nagin grabe ta dayon na natugunan kan mga responder.
Katakod kaini, an MDRRMO Libmanan nangapudan sa publiko na maglikay pirmi lalo na sa pagbiyahe sa panahon kan pagdagsa nin tawo asin sasakyan.
Pinapaandam man an mga residente na seguruhon na ligtas an saindang harong—saraduhan asin i-off an mga pinaggagamita nin kuryente asin gas kun mayong mawawalatan tanganing malikayan an sa kasulo. Pagirumdon pa kaini sa publiko na para sa madaliang tabang, pwedeng tumawag sa emergency hotline na 911.
