NAGA CITY- Mas orog pang nagdakol an mga nakolektar na basura kan Solid Waste Management Office-Naga kan nakalihis na kapaskuhan asin Bagong taon.
Sa entrevista kan Bombo Radyo Naga ki Engr. Joel Martin, pamayo kan Naga City SWMO-Naga, sinayay kaini na kan nakalihis na December 24 nakapagrehistro nin nasa 217. 64 tons na nakolektar na basura mantang kan December 25, nagpakol ini sa 179. 98 tons.
Kan nakalihis man na December 31, 2024 ini an nagpakol sa 153.28 tons mantang kan nakalihis man na Enero 1, 2025 ini an nagpakol sa nasa 227.62 tons.
Sigun ki Martin, an nasambitan ng data an nagpapahiling na haros triple an nilangkaw kan nakolektar na basura sa Naga City kan nakalihis na kasiributan.
Ini an maikokonsederar na alarming nin huli ta boot sabihon sana kan mga numero na nasambitan, orog pang naglalangkaw an basura sa siyudad.
Katakod digde, an pagigin sentro kan komersyo, dakol na nagdadayo asin an kakayanan kan mga tawo na magbakal an nahihiling na mga rason sa paglangkaw kan basura.
Huli kaini, tanganing masierto an kalinigan sa bilog na siyudad, pasado ala 1 pa sana nin mag-oomagahon nagpupuon na soboot an mga personahe kan SWMO-Naga na magrilinig tangani man na antes magsirang an aldaw malinig na orog na sa central district kan siyudad.
Kasabay kaini, liwat man na pigheras kan opisyal na limitado sana man an budget kan saindang opisina alagad na-train na soboot sinda na kaipuhan magtipid asin ma-maximize an saindang pondo para sa karahayan kan bilog na Naga City.
Sa ngunyan, pigsierto na sana ni Martin na padagos an paglalapigot kan saindang opisina tanganing mamantinir an kalinigan sa bilog na Nag City.
