Naobserbaran kan Solid Waste Management Office kan Ciudad nin Naga an pagbaba kan volume kan basura na nakolekta ngonian na Peñafrancia Festival.
Sa entrevista kan Bombo Radyo Naga ki Engr. Joel P. Martin, Head, Solid Waste Management Office, sinabi kaini na Hale sa 230 tonelada kan Setyembre 11, nagbaba ini sa 146 tonelada kan Sabado asin 143 tonelada kan Setyembre 13. Alagad, naglangkaw giraray ini sa 243 tonelada na nakolekta kan Domingo.
Padagos an pag-analisar kan opisina kan datos ngani na maaraman kun padagos an pagbaba kan waste generation sa ciudad.
Mientrastanto, sinabi kan opisina na dakulang tabang an kooperasyon kan mga eskwelahan, organisasyon, pribadong sektor, asin kan publiko sa pagmantenir kan kalinigan sa ciudad durante kan mga aktibidad kan Peñafrancia Festival.
Tinawan duon man an importansya kan tamang waste segregation asin pagsunod sa schedule kan pagkolekta kan basura para mamantinir an kalinigan sa Naga.
