Nagkondusir an National Police Commission (NAPOLCOM), katuwang kan Naga City Police Office, nin crime prevention and safety seminar sa Balatas National High School bilang parte kan pag-obserbar kan 32nd National Crime Prevention Week ngonian na enot na semana kan Setyembre.
Sa intrevista kan Bombo Radyo Naga ki Atty. Franco Fermin B. Avila, NAPOLCOM, Naga City Officer, sinaysay kaini na atuyuhan kan aktibidad na mapalawig an kaaraman kan mga estudyante, paratukdo, asin mga magurang manungod sa crime prevention asin safety, kasabay kan pagduon na an crime prevention sarong shared responsibility na nangangaipo nin kooperasyon kan bilog na komunidad.
Pinag-olayan man sa seminar an papel kan Student Crime Prevention Committee (SCPC) asin kan gobyerno kan mga estudyante sa paghiras nin kaaraman asin mga praktikal na lakdang tanganing maibitaran an krimen. Pigklaro kan NAPOLCOM na an pagpili kan Balatas National High School bilang venue para sa nasabing aktibidad dae konektado sa mga nakaaging insidente nin karahasan sa mga eskwelahan.
Apwera sa seminar, nagkaigwa man nin kampanya sa impormasyon manungod sa National Crime Prevention Program kan NAPOLCOM, kabali an Community and Service-Oriented Policing System. Inenkaminar an mga estudyante, magurang, asin mga paratukdo na magin vigilante, proaktibo, asin tulos na ireport sa mga awtoridad an ano man na makaduda na pangyayari.
Mientrastanto, pinagirumdom man an publiko na kun igwang pulis o lokal na awtoridad an imbuelto sa pagbalga, pwedeng ireport an insidente sa NAPOLCOM asin iba pang nanonongdan na disciplinary authorities. Tinawan duon na importante an konkretong aksyon asin kooperasyon hale sa publiko tanganing mamantenir an kaligtasan asin maibitaran an krimen sa komunidad.
