NAGA CITY– Piglinaw ni Alex Marpuri, tagapagtaram kan Commission on Election (COMELEC)-CamSur na kwalipikado pa an mga kandidatong mawot na magpa-file nin Certificate of Candidacy (COC) sa ibong kan pagigin imbwelto sa anuman na kaso.
Katakod ini sa suhestyon kan Department of Interior Local Government (DILG) na dae na pagtugutang magdalagan sa 2019 midterm election an mga kandidato na yaon sa drug watchlist o pigkokonsiderar na mga narco politician.
Sa entrevista kan Bombo Radyo Naga ki Marpuri, sinaysay kaini na mayo pa nin poder an COMELEC na sayumahan an isusumitir na aplikasyon kan mga makandidato na imbwelto sa transaksyon nin iligal na droga magin sa ibang kaso.
Sigun ki Marpuri, kwalipikado pa an mga kandidatong igwang pighahampang na kaso orog na kun dae pa naisapinal an desisyon digdi kan korte.
