NAGA CITY – Tinatayang aabot sa P30,000 ang halaga ng iligal na droga ang nakumpiska ng mga otoridad mula sa dalawang suspek sa isinagawang buy bust operation sa Daet, Camarines Norte.
Kinilala ang mga suspek na sina Melvin Macandog , 42-anyos at Royce Kier Capillo, 26-anyos, kapwa residente ng Purok 5, Barangay Camambugan, sa nasabing bayan.
Sa nakalap na impormasyon ng Bombo Radyo Naga sa Camarines Norte Police Provincial office (CNPPO), napag-alaman na nakumpiska kay Macandog ang pitong piraso ng pakete ng pinaniniwalaang shabu habang limang piraso naman ng pakete ang nakuha kay Capillo.
Sa inisyal na imbestigasyon ng mga otoridad, nabatid na umabot sa 4 grams o nagkakahalaga ng P30,000 ang nakumpiskang shabu kina Macandog at Capillo.
Sa ngayon, nasa kustodiya na ng mga otoridad ang mga suspek para sa karampatang disposisyon.
