NAGA CITY-Pighamon kan National Wage Coalition an Regional Tripartite Wages and Productivity Board(RTWPB)–National Capital Region(NCR) na langkawan an sweldo kan mga obrero nin ₱150.00.
Ini kasabay kan pigsagibong public hearing manunungod sa paglangkaw kan minimum wage para sa mga obrero kan pribadong sektor sa Metro Manila.
Sigun sa grupo, an paglangkaw nin ₱150 sa minimum na sahod kan mga obrero an enot na lakdang tanganing maprotehiran asin masimbagan an karapatan kan mga obrerong Pilipino na magkaigwa nin nakakabuhay na sahod.
Kun sadit sana soboot na wage increase an kayang itao kan wage board, nangangahulugan ini na kaipuhan nang buwagon an regional wage-setting mechanism.
Sigun sa grupo, klaro na dai bastante an presenteng minimum wage kan mga obrerong Pilipino tanganing makabakal nin akmang pagkakan para sa saindang mga pamilya.
Sa presente, pigtutulod kan grupo an pagkakapasar nin legislated ₱150 na dugang sa minimum wage kan mga obrero, na padagos man na pigdadangog kan Hababa asin Nakalalangkaw na Kapulungan kan Kongreso.
