NAGA CITY- Iwal sa pag-sasadiri kan pamilya an hinihiling na motibo sa pananaksak kan sarong babae sa saiyang tugang sa Barangay San Felipe sa ciudad nin Naga.
Sa entrevista kan Bombo Radyo Naga sa suspek na si Jocelyn Gemma Dado-Batasan, sinaysay kaini na an pinunan kan saindang pag-iiwal an pagmamawot kan lado kan saiyang matuang tugang asin biktimang si Manuel Dado, 54-anyos na ipabakal an saindang harong na pigwalat kan saindang mga magurang.
Dugang pa kan suspek, antes pa an insidente, nagkaigwa na sinda nin kasunduan ni Dado manungod sa nasambitang orolay alagad tinawan doon kaini na dae pwedeng solohon kan biktima an harong huli ta pagsasadiri suboot ini kan saindang mga magurang asin mayo man partikular na taong pigwalatan kaini an saindang pamilya.
Pahayag pa ni Batasan, pigsabunutan asin sinampaling siya ni Dado kun kaya nagkua siya nin patarom asin sinaksak sa likudan an tugang.
Idinalagan pa sa ospital an biktima alagad pigdeklarar ining dead on arrival kan doktor.
Mientrastanto, tinawan doon kan suspek na dae siya interesado sa harong asin nagbabakasyon sana siya sa ciudad.
Nasa kustodiya na kan pulisya an suspek mantang nagpapadagos an imbestigasyon sa nasambitang pangyayari.
