Sarong grupo hale sa National Bureau of Investigation (NBI) an nakatalaan na magbiyahe pasiring sa Laos tanganing imbestigaran an 521 kilo kan shabu na pig prubaran ipuslit sa Pilipinas.
An saindang katuyuhan iyo an makipag-koordinar sa mga lokal na awtoridad asin mangalap nin impormasyon manungod sa shipment.
Segun sa NBI, hinahalat na sana ninda an pormal na abiso hale sa gobyerno kan Laos antes magpadagos sa planong ini.
Malinaw na sinabi ni NBI Director Melvin Matibag na an obheto kan NBI bako an mag-aresto sa Laos, kundi an imbestigaran an shipment tanganing maaraman an nag-areglo kan booking kan flight asin an mga indibidwal na konektado digdi.
Sa irarom kan prinsipyo kan “territoriality sa batas kriminal,” an mga pagbalgar pirming nililitis sa nasyon kun sain nangyari an krimen.
Sa ibong kan mga isyu sa hurisdiksiyon, pursigido an NBI na ipagpadagos an imbestigasyon para sa kapakanan kan Pilipinas, orog na tanganing maaraman an mga nasa likod kan pagpadara kan shabu.
