NAGA CITY- Magigin mahigot soboot an gigubuhong monitoring kan Naga City Police Office dapit sa saindang programa na Oplan Iwas Paputok.
Sa nagin paghampang sa mga kagawad kan media ni PLtCol. Dario Sola, an Deputy City Director for Administration kan NCPO, sinaysay kaini na sa pigkundusir na meeting kan hepatura kaibahan an lokal na gobierno kan Naga, pigpapatukoy na kun saen na lugar o area sa siyudad nin Naga pwedeng magpabakal nin firecrackers an otorisadong paratienda.
Sigun pa ki Sola, an mga tutugutan na makapagbakal nin mga paputok an dapat nagsairarom sa seminar na ikukundusir kaibahan an mga magkakanigong ahensiya tanganing matawan an mga ini nin certificate of compliance na saro sa mga requirements tanganing magin legal an pagpapabakal nin mga paputok nin huli ta an mga dae otorisado an dadakupon asin kakasuhan.
Dugang pa kan opisyal, plano kan LGU-Naga na magkaigwa nin community fireworks display tanganing malikayan an mga insidente huli sa kanya-kanyang pagpapaputok kan mga residentes.
Kasabay digde, pigtawan duon pa ni Sola na igwang ii-standby na fire trucks asin medics orog na sa pagsabat kan Bagong taon tanganing tolos na makapagresponde sa panahon kan emerhensiya.
Sa ibong na lado, liwat man na piglinaw pa kan opisyal na saindang kukumpiskaron an mga boga na piggagamit kan ibang indibidwal orog na kan mga kajovenan nin huli ta bawal ini asin delikado. Apwera digde, mapaluwas man soboot sinda nin listahan kan mga paputok na bawal siring kan Piccolo asin Watusi.
Sa ngunyan, hagad na sana ni Sola an kooperasyon kan publiko tanganing malikayan an anuman na insidente.
