NAGA CITY- Magpapautob nin full alert status an Naga City Police Office katakod sa isasagibong State of the Nation Address ni Presidente Ferdinand Bongbong Marcos Jr sa aldaw nin Lunes.
Sa nagin paghampang sa mga kagawad kan media ni PLTCol. Salvador Ortañez Jr, an Deputy City Director for Operations kan NCPO, sinaysay kaini na padagos an saindang monitoring sa mga makundusir nin rally sa aldaw nin Lunes.
Katakod kaini, laoman na an pag check kan legitimacy kan magsasagibo nin hiro-protesta tangani man na masierto na salbado an pagkundusir kaini asin mayong magbungkaras na anupaman na kariribukan o insidente.
Dugang pa kan opisyal, yaon an saidang mga personahe tanganing magtao nin asistensiya sa publiko asin pigsierto na dae pupugulan an anuman na rally na isasagibo. Magkakaigwa sana nin mahigot na pagbabantay tangani man na magin salbado an gabos.
Mientrastanto, pakiulay man ni PLTCOL Dario Sola, an Deputy City Director for Administration kan NCPO na tutukan sana an mga isyu na mawot nindang ipaabot sa gobierno tanganing magin malinaw an saindang mawot na ipasabot sa Presidente.
Sa ngunyan, preparado na soboot an NCPO sa pagmantinir kan katuninongan asin seguridad para man sa ikatolong SONA kan Presidente.
