NAGA CITY- Magpapautob nin re-shuffling an Naga City Police Office sa saindang mga personahe katakod sa ikukundusir na 2025 midterm elections.
Sa nagin paghampang sa mga kagawad kan media ni PLtCol. Dario Sola Deputy City Director for Administration kan NCPO, sinaysay kaini na kaipuhan an pagsunod sa deriktiba na gikan sa halangkaw na opisina kan Pambansang pulisya na kun saen nagsusugo na kaipuhan maibalyo an sarong Police na igwang kaparientes na madalagan sa saindang lugar hasta sa pig-aapod na 4th degree Consanguinity o Affinity.
Sigun ki Sola, an nasambitan ng lakdang an importante tanganing magtinir na neutral asin apolitical an mga kapulisan sa bilog na durasyon kan eleksyon.
Halimbawa, an mga pulis na igwang kaparientes na madalagan sa Camarines Sur an ibabalyo sa CamNorte tanganing masierto na magigin malinig an resulta kan election.
Katakod kaini, aminado man an opisyal na maapektaran an operasyon kan saindang opisina alagad kaipuhan na magsunod sa kasuguan huli ta sinda an sakop kan mandato na ini.
Sa ngunyan, hagad na sana ni Sola an kooperasyon kan mga kapulisan para sa pagmantinir kan katuninongan sa ikukundusir na 2025 midterm elections.
