NAGA CITY- Mahigot an pagbabantay kan mga personahe kan Naga City Police Office sa mga sementeryo kasabay kan pagrumdom sa Undas 2024.
Sa entrevista kan Bombo Radyo Naga ki PMaj. Juvy Llunar NCPO Station 2 Commander, sinaysay kaini na 12 hours basis an saindang mga personahe kun saen pigbanga an mga ini sa manlaen-laen na areas of concern.
Sigun sa opisyal, huli ta bastante man an saindang mga personahe, igwang naka-assign sa pagmanehar kan trapiko, parking asin an iba an maikot sa palibot kan sementeryo tanganing siertuhon an kasalbaduhan kan publiko. Apwera digde, pighigutan pa kan NCPO Station 2 an saindang visibility asin anti-crime orog pa ta igwang mga kawatan an pigsasamantala an siring na kasiributan.
Katakod digde, liwat man na nagpagirumdom si Llunar sa publiko na mahabol pa sa pagbisita sa mga sementeryo, dae na magdara nin bladed weapon na gagamiton sa paglilinig nin huli ta dae na ini pigtutugutan na makalaog asin pigpapawalat sa assistance center, bawal man an arak o nasa impluwenisiya na kan arak asin bawal an mga speakers na makusugon na pwedeng makaperwisyo sa ibang pagtaraid.
Sa ngunyan, pakiulay na sana kan opisyal sa iba na dae na magdara nin behikulo huli ta limitado sana man an espasyo para sa parking area.
