NAGA CITY- Pigheras kan Naga City Police Office an saindang mga nagin accomplishment puon October 14 hasta October 20, 2024.
Sa nagin paghampang sa mga kagawad kan media ni PLtCol. Chester Pomar, tagapagtaram kan NCPO, sinaysay kaini na sa nasambitan ng peryodo, igwang pigkundusir na 4 na operasyon kontra iligal na droga na kun saen 5 an naarestrar.
Apwera digde, yaon man an an saindang operasyon sa mga wanted persons kun saen sa saindang ginibong 7 operasyon, 7 man na indibidwal an nadakop.
Saro sa mga ini an pigkokonsederar na most wanted persons mantang an iba para man sa kasong libel, robbery, theft, rape, illegal gambling, shoplifting/theft asin robbery and anti-fencing law na kun saen arestado man an sarong 22-anyos asin sarong menod de edad.
Para man sa pigkundusir na One Time Big Time na pigsagibo kan nakalihis na October 17, puon alas 8am hasta 10am sa may parte kan Bagumbayan Sur, Naga City, igwang na-isyuhan nin 77 citation tickets asin igwang na-impound na behikulo.
Sa ngunyan, pigsierto na sana kan opisyal na padagos an saindang mga ginigibong lakdang tanganing mamantinir an paz y orden sa Naga City.
