NIA-Bicol, pinara an paghandal kan publiko na posibleng maraot an Buhi flood control structure re pag-uulan
NAGA CITY- Pinara kan National Irrigation Administration (NIA) Bicol an paghandal kan nagkapirang mga residente na posible suboot na maraot an flood control structure sa banwaan nin Buhi katakod kan namamatean na raot nin panahon sa probinsya nin Camarines Sur.
Sa entrevista kan Bombo Radyo Naga ki Ed Yu, tagapagtaram kan NIA-Bicol, sinaysay kaini na mayong dapat na ipaghandal an mga residente hale sa manlaen laeng banwaan sa Rinconada area huli ta makakasierto suboot na pusog an Buhi Flood Control Structure na nagre-regulate kan water level elevation hale sa lake Buhi.
Basado sa saindang pinakahuring monitoring, nag-abot na sa 83.95 meters an lebel kan tubig sa lake Buhi na nagresulta sa pag-apaw kaini suodma.
Tinawan doon man ni Yu na natural sana an paglangkaw kan lebel kan tubig sa nagkapirang mga salog na aagihan kan tubig hale sa nasambitang flood control structure asin posible ining magresulta sa pagbabaha sa mga low lying areas sa manlaen laeng mga banwaan sa Camarines Sur.
Napag-araman na an Buhi Flood Control Structure an pigkokonsiderar na pinakadakulang water reservoir kan NIA sa bilog na Bicol region.
Pigsierto man ni Yu na mahigot an ginigibo nindang monitoring sa nasambitang dam urog pa ngonyan na maraot an kamugtakan nin panahon sa probinsya.
