NAGA CITY- Tinawan doon ngonyan kan National Youth Commission (NYC) na mahigot nindang ipapautob an ‘No mandatory training, No assumption of office’ sa gabos na mga nailihir na miyembro kan Sangguniang Kabataan.
Sa entrevista kan Bombo Radyo Naga ki Sheridan Gajete, SK Secretariat kan NYC, sinaysay kaini na mahigot na imomonitor kan saindang ahensya an nasambitang polisiya na nakapalaog sa Sec. 27 kan RA 10742 o an SK Reform Act.
Basado sa nasambitang ley, kinakaipuhan na magsairarom muna sa nasambitang mandatory training an mga nailihir na mga SK Officials antes an mga ini tugutan na makatukaw sa pwesto.
Katakod kaini, sigon ki Gajete, nakatalaan gibuhon an nasambitang training poon Mayo 17 hasta 26 ngonyang taon na sarabay suboot na gigibuhon sa manlaen laeng parte kan Pilipinas.
