Pigreport kan South Korean Defense Intelligence Agency (DIA) na padagos soboot nagpapadara an North Korea nin mga artillery shells sa Russia puon kan magpuon an giyera sa Ukraine.
Basado sa DIA, mabi 28,000 containers na igwa sanang artillery shells asin iba pang bala an ipinadara kan Pyongyang sa Russia – katampad kan pigkakarkulong 12 million na 152mm artillery rounds.
Sigun man sa report kan Bloomberg bako sana soboot mga bala an naipadata kan North Korea.
Naghehewas na man soboot an military support kan Pyongyang, kaibahan na an pagpapadara kaini nin missiles, self-propelled guns, asin mga military combat.
Enot na man na pigbuyagyag mi Kyrylo Budanov, pamayo kan Ukrainian military intelligence, na pwedeng 40% kan ammunition needs kan Russia an presenteng pigsusuplay kan North Korea.
Nagtatao soboot an Pyonyang nin mga dekalidad na armas siring kan ballistic missiles asin artillery systems.Apwera sa armas, nagpuon na man soboot an North Korea na magpadara nin mga tropa asin military experts.
Marurumdumang puon kan nakalihis na Oktubre 2024, pigkakarkulong 13,000 soldados na an ipinadara kan Pyongyang tanganing magtabang sa Russia.
Piglalaomang mapadara pa ini nin 5,000 construction workers asin 1,000 military engineers (sappers) ngunyan na Hulyo o sa maabot na Agosto sa Kursk sigun sa South Korea’s spy agency.
Padagos man na nagrararaom an koneksiyon kan Russia asin North Korea sa tahaw kan peligro sa rehiyon kun saen kasuarin sana, nagbisita si Russian Minister Sergei Lavrov sa Pyongyang, asin pigkompirmar an suporta ni Kim Jong Un sa Kremlin.
Karibay kan suporta, nagtatao soboot an Russia nin pinansiyal na tabang asin teknolohiya sa North Korea, na nagtatabang sa rehimen ni Kim tanganing matapyasan an epekto kan “International Isolation”.
