NAGA CITY- Inako na ngonyan kan suboot miyembro kan Norben Gruta Command kan rebeldeng New People’s Army (NPA) na sinda an yaon sa likod kan pananambang sa convoy kan pulis asin mga soldados sa Barangay Mambulo Nuevo, Libmanan, Camarines Sur kan nakaaging Sabado.
Sa mensaheng ipinaabot kan nagpabistadong tagapagtaram kan NDF-Bicol na si Ka Ma. Roja Banua, sinaysay kaini na solamenteng an mga pulis asin soldados an target kan saindang pag-atake komo parte an mga ini kan Joint Task Force Bicolandia asin mayong nadamay na sibilyan digdi, suway sa nagin pahayag suboot kan militar na igwang kaibanang doktor hale sa Bicol Medical Center sa tinambangang convoy.
Mientrastanto, enot naman na sinaysay ni Col. Paul Regencia, tagapagtaram kan 9th Infantry Division, Philippine Army, sa entrevista kan Bombo Radyo Naga, na padagos an operasyon kan mga militar para dae na mautro pa an bayolensya na ginigibo kan mga rebelde na posibleng makadamay an mga sibilyan.
Marurumduman na pasiring sa kasentrohan kan banwaan nin Libmanan an convoy makalihis an medical mission sa Barangay Bagamelon kan bigla na sanang nagsabog an pigtutubudang improvised explosive device (IED) sa Barangay Mambulo Nuevo na pigsundan nin putok nin badil hale suboot sa lado kan mga rebelde, kun saen nairido an anom na mga pulis.
