Bumaba na an numero kan mga aking Pilipinong dae bakunado sa nasyon sigun man sa Department of Health (DOH). Gikan sa dating labi sa 1 million kan 2020-2021, nagbaba ini sa 163,000 kan taong 2023.
Iniugnay kan ahensiya an dakulang pagbaba sa pinahigot na pagbabakuna sa national asin local levels.
Susog sa DOH, sa datos kan nakalihis na Pebrero 2025, nasa labi sa 1.5 milyong aki edad 0-12 bulan an kumpleto an bakuna.
Sa ibong kan pagbaba kan mga dae bakunadong aki, nagpatanid an DOH na posibleng mauntok o ma-reverse kun mayo nin padagos na pondo, supply chain support asin man political will sa gabos nin lebel kan gbyerno.
Kasabay kan pagmarka kan World Immunization Week kan nakalihis na Abril 24 hasta sa petsa 30, masagibo an DOH nin pagbabakuna sa Calbayog City sa Samar kun saen labi sa 31,000 indibidwal an pinagalaomang bakunahan.
Digde makakarsiber an mga aki edad 0 hasta 12 bulan nin bakuna para sa tuberculosis, polio, pneumonia, measles, mumps, rubella, asin pentavalent vaccine.
Mantang ibabakuna man an flu asin pneumonia vaccines para sa mga gurang mantang mga aking babae edad 9 hasta 14 anyos an tatawan nin HPV vaccine asin makakaresiber man an mga bados nin tetanus-diphtheria vaccine.
