Pinagpapapreparar na ngunyan kan Office of Civil Defense (OCD) an para sa posibleng epekto kan habagat sa nasyon.
Sa sarong pahayag, nag-abiso an OCD sa publiko na magtinir na vigilante asin preparado huli ta mapadagos an epekto kan habagat sa nasyon na iyong madara nin makukusog na pag-uran sa dakulang parte kan Pilipinas.
Nagkapira sa mga rehiyon na posibleng maapektaran kaini iyo an dakulang parte kan MIMOROPA, Western Visayas, Bicol region asin Quezon Province mantang panaka-nka asin kalat-kalat na pag-uran man an mamamatean sa dakulang parte kan Metro Manila.
Sigun ki OCD Officer-In-Charge asin Assistant Secretary Bernardo Rafaelito Alejandro IV, maski na nakaluwas na nin nasyon an Bagyong Fabian, igwang nakaambang huma pa man giraray huli sa posibilidad na pagkakaigwa nin landslide asin pagbaha dara kan habagat.
Kasunod kaini, pigsierto man ni Alejandro sa publiko na padagos an saindang implementasyon kan preparedness measures para sa mas marekas na pagresponde sa maski anumang emerhensiya.
