Pigsierto Kan Department of Migrant Workers (DMW) an tabang para sa mga overseas Filipino workers (OFWs) sa Jamaica asin an haraning Caribbean islands na naapektaran kan Hurricane Melissa, an pinakamakusog na bagyo sa historya kan Jamaica.
Sa pahayag kan Huwebes, nagpaabot nin pagkumsuta si Migrant Workers Secretary Hans Leo Cacdac sa mga OFWs asin sa saindang mga pamilya sa Pilipinas.
Nakikipag-tabangan an DMW sa Philippine Embassy sa Washington, DC, Philippine Honorary Consulate sa Jamaica, asin mga lider kan komunidad kan Pilipino.
Pig-abisuhan man kan sekretaryo an mga OFWs na magtinir sa laog kan harong, magpasiring sa salbadong shelter, ibugtak sa waterproof na laagan an importanteng dokumento, asin sunudon an opisyal na advisories.
An Hurricane Melissa, Category 5 kan nagtama sa Jamaica, nagkawsa nin pagbaha, brownout, asin pagkagadan kan 25 tawo sa Haiti asin apat sa Jamaica.
Padagos na pigmomonitor kan DMW an sitwasyon tanganing masierto na makaabot an tabang sa mga nangangaipuhan.
Para sa emergency o consular assistance, pwedeng makipag-tabangan an mga OFW sa Philippine Embassy sa Washington, DC, MWO-OWWA office, o Philippine Honorary Consulate sa Jamaica.
