(UPDATE) NAGA CITY-Labi sa sarong dekada na suboot na nagseserbeng bagsakan nin shabu an pig-raid na drug den kan mga otoridad sa Lucena City.
Sa ekslusibong entrevista kan Bombo Radyo Naga ki P/Supt. Vincent Cabatingan, hepe kan Lucena City PNP, sinaysay kaini na nagseserbe man suboot na taguan kan mga wanted persons asin mga miyembro kan gun for hire group an nasambitang “Oldest Shabu Tiangge.”
Napag-aramang mahigot an ginibong pagpaplano kan PNP antes na piggibo an operasyon sa Purok Isla Matahimik sa Barangay Cotta.
Naggamit pa suboot sinda nin drone para ipasairarom sa surveillance an lugar kun kaya naaraman nindang ini an bagsakan nin shabu sa lugar asin langkaba man an barakalan nin pigpapangalad na bulong digdi.
Sigon ki Cabatingan, pwera an nasambitang drug den kaya dae nagin pasil an saindang operasyon urog pa ta saro sana an entrance asin exit digdi.
Marurumduman na napuli sa 15 minutos na riribayan nin putok an pigkondusir na anti-illegal drug operation kan PNP na nagresulta sa pagkagadan kan duwang mga drug personality asin pagkakaarestar kan 23 na iba pa.
