Pormal nang nanumpa kasuodma si former Department of Justice Sec. Jesus Crispin ‘Boying’ Remulla komo bagong Ombudsman.
Kun saen opisyal na ining maikokonsiderar komo ika-pitong tanod-bayan kasunod kan saiyang rinibayan na si Samuel Martires.
Pinangenotan mismo ni Supreme Court Associate Justice Marvic Leonen an nasambitan ng oath taking ceremony isinagibo sa Korte Suprema.
Sa sarong entrevista sa bagong Ombudsman, nagheras nin mensahe si Remulla partikularmente sa mga tiwali asin korap na opisyal kan gobyerno.
Saiyang pigtawan-duon na mayo soboot ining sasantuhon huli man ta saiyang iimbestigaran asin ipapaapod an sisay man na igwang naaramang impormasyon.
Uusigin soboot an mga ini orog na an mga opisyal na maiimbwelto o nagmamalabis sa saindang mga responsibilidad.
Mantang saiyang pighurot man na dae masentro an saiyang pokus sa kun sisay na personalidad an imbwelto kundi sa kun anong kasong pwedeng mabilog.
Halangkaw man o hababa an posisyon kan opisyal, saiyang pigsierto na mayong sasantuhon maski pa soboot mga senador.
Dugang pa digde, kan mahapot man an bagong talagang Ombudsman kun iimbestigaran pati mga kaparientes kan Presidente enkaso imbwelto sa korapsiyon, mayo soboot ining ‘choice’ na pahimutikan ini.
Mayo soboot ining magiginibo kun igwang mapepresentang ebidensiyang makapagpatotoo sa pagkaka-imbwelto kan mga ini sa isyu kan katiwalian.
Kun kaya magigin bukas an Office of the Ombdusman tanganing makaguno nin bastanteng ebidensiyang pwedeng magamit sa pagsusunad nin kaso.
An nasambitan ng dating sekretaryo an ika-pitong Ombudsman kasunod kan pormal nang manumpa kasuodma sa pagkakatalaga ni Presidente Ferdinand Marcos Jr.
