Pigkumpirmar ni Ombudsman Jesus Crispin Remulla na igwang 12 hasta 15 kongresista an mahampang sa kaso sa Sandiganbayan makalihis na maibwelto sa soboo anomalya sa mga proyektong pang-imprastraktura kan gobyerno.
Sigun ki Remulla, kaibahan an mga ini sa 67 “congtractors” o mga kongresistang nagsirbi mang kontratista – sarong pagbalgar sa ley na nagbabawal sa mga opisyal kan gobyerno na magkaigwa nin pinansiyal na interes sa mga kontrata kan gobyerno, basado sa Republic Act 3019 o Anti-Graft and Corrupt Practices Act.
Sinaysay kan Ombudsman na an mga naunambitan ng lehislador an pigkokonsiderar na “low-lying fruits” o mga kasong madaling patotoohan, asin piglalaomang maisusunad na an enot na batch kan mga kaso sa Sandiganbayan antes mag-Nobyembre kan taong ini.
Napag-araman na nagpuon an imbestigasyon sa soboot flood control project anomalies sa Bulacan makalihis na magreklamo si Department of Public Works and Highways (DPWH) Secretary Vince Dizon kan nakalihis na Setyembre 11 kontra sa 20 opisyal kan DPWH-Bulacan 1st District Engineering Office asin limang pribadong kontratista.
Kaibahan man sa pig-iimbestigaran kan Ombudsman an posibleng pagkaka-imbwelto ni Commission on Audit (COA) Commissioner Mario Lipana sa mga soboot budget insertion para sa flood control projects, kun saen an saiyang agom an nakakua soboot nin pirang kontrata.
Sigun ki Remulla, marekas an magigin dalagan kan imbestigasyon huli man ta igwa nang input gikan sa COA asin Independent Commission for Infrastructure.Nakatalaan man ining makipag-ulay ki Sandiganbayan Presiding Justice Geraldine Faith Econg tanganing pag-ulayan an pagbilog kan espesyal na dibisyon na makapot sa mga kaso.