Dae na kaipohan pang magpila sa Land Transportation Office (LTO) offices o maggastos sa pamasahe nin huli ta pwede nang mag-renew nin drivers license online gamit an eGovPH App.
Sigun ki LTO Chief Assistant Secretary Atty. Vigor Mendoza II, obheto kan bagong sistema na gibuhong marekas, magian asin abot-kamay an proseso kan renewal dawa nasa harong o opisina an kliyente.
Kaipohan sanang i-download an eGovPH app sa App Store o Google Play, magsairarom sa security verification, asin sunudon an mga lakdang para sa online renewal.
Antes makapag-transaksyon, kaipohang kumpletuhon muna kan aplikante an mga Telemedicine medical examination sa paagi kan LTO– Online Drivers License Renewal System portal, asin Online Drivers Enhancement Program (ODEP) na may limang oras na online lecture.
Kasunod kaini, pwede nang bayadan an renewal fee gamit an napiling payment gateway.
An bagong Electronic Driver’s License an tulos mahihiling sa app asin may bisa siring kan physical card.
Pwede mang magpili kun ipadadara ini sa harong o personal na kukuanon sa pinakaharaning LTO district office.
