NAGA CITY– Irido an sarong opisyal kan Philippine Navy makalihis mabangga an piglulunadan kaining kotse sa sarong poon nin kahoy sa Barangay Comadaycaday, Del Gallego, Camarines Sur.
Sa nakuang impormasyon kan Bombo Radyo Naga mula sa Camarines Sur Police Provincial Office (CSPPO), napag-araman na binabaybay kan sarong Sedan na minamaneho ni Lt. Cmdr. Joey Colico PN, kaiba si Lt. Cmdr. Jaime Bulawa PN.
Pag-abot sa pakurbadang parte kan Andaya National Highway bigla na nawaran nin kontrol sa lunadan si Colico hasta sa magbangga ini sa sarong poon nin kahoy sa gilid an tinampo.
Katakod kaini, nairido an manlaen-laen na parte kan lawas an opisyal na tolos man na pigdalagan sa ospital mantang nakasalbar an kaiba kaini.
Sa ngunyan padagos an imbestigasyon kan mga otoridad dapit sa nasambitan nang insidente.
