Dakulang pakinabang sa ekonomiya para sa mga hoben kan Naga an piglalaoman ni Naga City Youth Mayor Isaiah Namoro sa halawig na panahon, orog na ngunyan na an syudad naghahanda para magin sarong ‘Highly Urbanized City’ (HUC).
Sa intrevesta kan Bombo Radyo Naga ki City Youth Mayor pigpahayag niya na an mga pagbabagong ipinapangako kan HUC piglalaoman na makakapababa sa pangangaipo kan mga hoben na maghanap nin oportunidad sa luwas kan Naga, huli ta an syudad nagmamawot na magtao nin mas marhay na paglaom sa laog kan saiyang sakop.
Idinugang pa ni Namoro na an pagkaigwa nin trabaho para sa mga bagong gradwado sa laog kan syudad sarong kritikal na lakdang pasiring sa pagpakusog kan ekonomiya para sa mga hoben.
Sinabi man niya na an mga kajovenan dapat magkaigwa nin boses para sa futuro kan syudad.
Sa ibong na lado, naglansar na an City Youth Office nin sarong digital na kampanya asin sa laog kan masunod na duwang semana, minamawot ninda na makaulay an mga kajovenan sa mga eskwelahan, partikular an mga student governments, sa paagi kan personal na diskusyon.
An kampanyang ini nakabase sa paagi kan syudad na nagtatao nin doon sa sektoral asin personal na pakikipag-urulayan.
