Sinaysay ni Senador Juan Miguel Zubiri na dakul sa saiyang mga kapwa senador an nagpahayag kan saindang kamawotan na dugangan an pondo kan Office of the Vice President sa 2025.
Ini makalihis na binawasan nin P1.2 bilyon kan Kamara an propuestong P2 billion na OVP fund huli sa pagsayuma ni Bise Presidente Sara Duterte na simbagon an mga kahapotan kan mga mambabatas sa paggamit kan budget kan OVP, kabale na an confidential funds.
Sigun ki Zubiri, an pulso kan mga senador iyo na ddugangan nin diit an budget kan OVP para sa masunod na taon.
Alagad sa ngunyan, hahalaton ninda an desisyon ni Senate Committee on Finance Chairman Senator Grace Poe kun ano an planong pagpondo sa opisina kan bise presidente huli ta premature o amay pa ngunyan kun ano an mangyayari.
Enot man na sinuportaran ni Senate President Pro Tempore Jinggoy Estrada an OVP fund para sa 2025.
Dapat suboot na itao an respeto asin onra sa ikaduwang pinakahalangkaw na opisyal kan nasyon.
Pano man suboot matrabaho an opisina kan bise kun babawasan n an pondo kaini, kaya mas maray suboot na ibwelta na sana an binawas na budget kan OVP.
